“तालुका उत्कृष्ट ग्रंथपाल” देवेंद्र भाजीपाले तर “वणी तालुका उत्कृष्ट ग्रंथपाल” शुभम कडू यांना सत्काराने सन्मानित.
लोकवाणी जागर.
यवतमाळ ग्रंथोत्सव २०२४ या अंतर्गत भव्य ग्रंथ प्रदर्शन, विक्री आणि विविध सांस्कृतिक कार्यक्रमाचे आयोजन जिल्हा ग्रंथालय अधिकारी कार्यालय, यवतमाळ यांच्या वतीने दिनांक २०, २१ फेब्रुवारीला डॉ. ए.पी.जे. अब्दुल कलाम अभ्यासिका, यवतमाळ येथे करण्यात आले होते. या कार्यक्रमाचे उद्घाटन पालकमंत्री मा. संजय राठोड यांच्या हस्ते करण्यात आले असून ग्रंथालयाच्या संदर्भातील सर्व समस्या सोडवू असे आश्वासन पालकमंत्री यांनी ग्रंथालय कर्मचारी यांना दिले.
सामाजिक, शैक्षणिक व सांस्कृतिक जीवन समृद्ध करण्यासाठी व वाचन संस्कृती वृद्धिंगत होण्यासाठी जिल्हातील शासनमान्य सार्वजनिक ग्रंथालयांचे योगदान लाभावे, यासाठी तसेच ग्रंथालयांचा गुणात्मक विकास व्हावा, या ग्रंथालयांकडून जिल्हातील जनतेला अधिक चांगल्या सेवा देण्यासाठी त्यांना प्रोत्साहन मिळावे या उद्देशाने जिल्हा ग्रंथालय अधिकारी कार्यालय, यवतमाळ यांच्याकडून “उत्कृष्ट वाचक / ग्रंथपाल / कार्यकर्ते / सेवक” यांचा सत्कार करून त्यांना सन्मानित करण्यात येते.
यवतमाळ जिल्हातील उत्कृष्ट ग्रंथालय यामधून नगर वाचनालय, वणी यांचा पालकमंत्री मा. संजय राठोड यांच्या हस्ते सन्मान करण्यात आला. तसेच जिल्हातील “तालुका उत्कृष्ट ग्रंथपाल” म्हणून नगर वाचनालय वणी येथील ग्रंथपाल मा. देवेंद्र भाजीपाले तर वणी तालुक्यातील “वणी तालुका उत्कृष्ट ग्रंथपाल” म्हणून क्रांतिज्योती सावित्रीबाई फुले सार्वजनिक वाचनालय, वणी येथील ग्रंथपाल मा. शुभम कडू यांचा सत्कार जिल्हा ग्रंथालय अधिकारी,यवतमाळ मा. कविता महाजन यांच्या हस्ते डॉ. ए.पी.जे. अब्दुल कलाम अभ्यासिका येथे आयोजित ग्रंथोत्सव २०२४ या कार्यक्रमात करण्यात आला. या सत्काराबद्दल संपूर्ण क्षेत्रातून त्यांच्यावर अभिनंदनाचा वर्षाव होत आहे.
मी तालुका “अ” वर्ग ग्रंथालयाचा ग्रंथपाल असून, माझ्या तालुक्यातील ग्रंथालयातील ग्रंथालयांना समृद्ध करणे व मार्गदर्शन करणे ही माझी नैतिक जबाबदारी असून मी नेहमीच त्यांच्याशी संपर्क करून त्यांना मार्गदर्शन करीत असतो, असे मनोगत देवेंद्र भाजीपाले यांनी सत्कार स्वीकारताना व्यक्त केले.
शुभम कडू यांनी सत्कार स्वीकारून, “माझ्या या ग्रंथालयीन सेवेत मला एकही दिवस कामाचा कंटाळा आला नाही इतकं या सार्वजनिक ग्रंथालयातलं काम वेगवेगळ्या प्रकारचं आहे.” ‘सेवेचे ठायी सदा तत्पर’ हे ब्रीदवाक्य आहे आणि या ब्रीदवाक्याला मी नेहमी कायम जागनार तसेच क्रांतिज्योती सावित्रीबाई फुले वाचनालयाने ग्रंथपाल म्हणून काम करण्याची संधी दिली. यामुळेच आज मी इथपर्यंत पोहोचले आहे. त्याबद्दल मी वाचनालयाचा कायम ऋणी आहे, असे मनोगत व्यक्त केले.
