शाळकरी विद्यार्थी वाहून नेणारा ऑटोला भीषण अपघात.
एक विद्यार्थी जागीच ठार – चार विद्यार्थी जखमी.
आनंद नक्षणे —मारेगाव
मारेगाव तालुक्यातील मार्डी येथून शाळकरी मुले तालुकास्थळी वाहून नेणारा ऑटो पिसगाव जवळ पलटी झाल्याने ऑटोतील एक विद्यार्थी अपघात स्थळीच ठार तर इतर चार विद्यार्थी किरकोळ जखमी झाल्याची घटना २७ ऑक्टोबर रोजी आज सकाळी ६:३० वाजे दरम्यान घडली.
अनिकेत श्रावण पिंपळशेंडे (१६) रा .केगाव असे ऑटो पलटी होऊन अपघात स्थळीच ठार झालेल्या विद्यार्थ्याचे नाव आहे अनिकेत हा मारेगाव स्थित राष्ट्रीय विद्यालयात दहाव्या वर्गात शिकत होता.
दरम्यान २७ ऑक्टोबर रोजी सकाळी मार्डी येथून दहा ते बारा विद्यार्थी घेऊन ऑटो मारेगावकडे येत होता. सदर ऑटो पिसगाव नजीक पोहोचला असता पांढरकवडा बायपास कडून एक दुसरा ऑटो भरधाव येत होता. यावेळी विद्यार्थी वाहून नेणाऱ्या ऑटो चालकांने दोन ऑटोंची धडक टाळण्याकरिता ऑटोचे ब्रेक मारले.यावेळी अनिकेत बसून असलेल्या बाजूने ऑटो पलटल्याने अनिकेत हा ऑटो खाली दाबून काही फूट पुढे घासत गेला.
यात अनिकेतच्या डोक्याला जबर मार लागून तो घटनास्थळीच ठार झाला.तर ऑटोतील इतर तीन विद्यार्थी किरकोळ जखमी झाले.
अपघाताची माहिती प्राप्त होताच पिसगाव येथील काही नागरिकांनी घटनास्थळी धाव घेत, जखमी विद्यार्थ्यांना मारेगाव ग्रामीण रुग्णालयात दाखल केले आहे. तूर्तास इतर तीनही विद्यार्थ्यांची प्रकृती धोक्या बाहेर असल्याची माहिती आहे.
भरधाव वेगाने वाहणारी वाहंने, ऑटो रिक्षा या वर पोलीस प्रशासनला विशेष लक्ष देण्याची गरज असून दोन्ही ऑटो चालकावर पोलीस काय कारवाई करणार याकडे जनतेचे लक्ष लागले आहे.
